大熊貓命名比賽 及 大熊貓繪畫比賽

【「大熊貓命名比賽」及「大熊貓繪畫比賽」 10月2日展開喇！】

中央政府贈港嘅兩隻大熊貓安安（雄性原名）同可可（雌性原名）正式加入香港大家庭喇！為咗歡迎佢哋，由文體旅局主辦、海洋公園公司（海洋公園）協辦嘅「大熊貓命名比賽」同「大熊貓繪畫比賽」今日展開，大家記得唔好錯過！

「大熊貓命名比賽」正式開始，歡迎所有香港居民喺10月27日前發揮創意，為兩隻大熊貓分別建議一個有意義，同能夠突顯佢哋特質嘅中文名，並以中文不多於100字解釋新名嘅意義。參加者亦可以建議兩隻大熊貓繼續沿用原名，連同名字意義嘅解釋參賽。經評審選出嘅最佳作品將會成為兩隻大熊貓嘅新名㗎～

除咗命名比賽，亦歡迎大家10月21日至11月8日投稿參加「大熊貓繪畫比賽」。比賽會分三個組別進行，分別為公開組（供香港居民參加）、中學組（供中一至中六學生參加）以及小學組（供小一至小六學生參加）。參加者可以參照兩隻大熊貓嘅照片同生活片段，將佢哋可愛嘅一面繪畫出嚟。各位可以喺比賽期間提交手繪畫作，並以中文不多於100字說明作品背後意思。

大熊貓命名比賽
投稿日期：10月2日至10月27日

大熊貓繪畫比賽
投稿日期：10月21日至11月8日

大家記得把握時間參加比賽，一齊慶祝大熊貓加入香港大家庭嘅呢場盛事！比賽結果將於今年年底前公布，得獎者將獲專函通知。

兩隻大熊貓而家喺海洋公園接受為期一個月嘅檢疫隔離，之後仲需要約一個月時間適應新環境。專家會再按大熊貓嘅健康同適應情況，盡快安排大熊貓與公眾見面！