香港海洋公園喜迎首對香港出世大熊貓雙胞胎

【最新消息】香港海洋公園喜迎首對香港出世嘅大熊貓雙胞胎！

好消息！深受大家喜愛嘅大熊貓盈盈，喺2024 年 8 月 15 日，即係佢 19 歲生日嘅前一日，成功誕下一隻雌性同一隻雄性大熊貓 BB！

海洋公園公司主席龐建貽表示，呢對港產大熊貓 BB 嘅誕生，同埋即將抵港嘅兩隻新大熊貓，對海洋公園以至成個香港，無疑係振奮人心嘅消息！海洋公園衷心感謝中央政府多年來對香港嘅慷慨支持，令香港得以成功孕育大熊貓BB！

盈盈係有紀錄以來最年長初次成功產子嘅大熊貓，呢對大熊貓BB嘅誕生係罕有案例！感謝公園動物護理同獸醫團隊，對盈盈同樂樂無微不至嘅照料，以及中國大熊貓保護研究中心（熊貓中心）多年來與公園合作無間，為海洋公園提供專業意見同協助，令盈盈同樂樂得以榮升父母！

首次生產嘅盈盈全程表現得非常緊張，大部分時間都瞓喺地上不停扭動，喺公園團隊同熊貓中心嘅專家安撫下，盈盈先後於 8 月 15 日凌晨 2 時 05 分及 3 時 27 分，平安誕下一對雙胞胎，整個生產過程歷時 5 個多小時。雙胞胎依出生次序為重 122 克的雌性大熊貓 BB 以及重 112 克的雄性大熊貓BB。

兩隻 BB 現時非常脆弱，需要時間穩定狀況，特別是雌性 BB 出生後體溫較低、叫聲較弱、進食量亦較低。目前兩隻 BB 均由公園護理和獸醫團隊，以及熊貓中心嘅專家 24 小時加護照顧。

知道大家都好想快啲見到大熊貓 BB，敬請大家耐心等候！大熊貓BB會喺幾個月後，登場同大家正式見面！