月全食超級滿月 526晚睇YouTube直播

提提大家，今晚唔單止有機會觀賞到月全食，亦會出現全年最大嘅滿月，即係「超級滿月」，月亮嘅直徑會較平日嘅滿月大百分之七左右及呈不常見嘅銅紅色。

小貼士：今次月全食會在月出前開始，因此月亮會帶食而出。由於月食期間月亮嘅仰角較低，若天氣情況許可，面向東南方而沒有障礙物地點係觀賞月食過程最佳位置。

月全食會喺星期三晚七時零九分開始，至七時二十八分結束，食甚時間為七時十九分。月全食期間月亮唔會完全消失，而會呈現暗紅色，原因係太陽光中藍色波段喺地球大氣層散射過程中被散射，剩餘嘅紅光再被折射到月球上。

香港太空館屆時會透過其YouTube頻道 www.youtube.com/hkspacem 直播月食天文現象，並由館長們分享包括超級滿月等月食相關有趣知識。大家亦可以瀏覽康文署「寓樂頻道」嘅「互動+01」網頁 www.lcsd.gov.hk/edutainment/tc/academy/page_74.html 、 康文＋＋＋ Facebook專頁 及 香港太空館 Hong Kong Space Museum Facebook專頁同步觀賞月食。