【香港郊野公園 六月山曆 蝶蝶．不休】六月係蝴蝶出沒嘅旺季，生物多樣性豐富嘅紅花嶺郊野公園亦蝶蹤處處。蝴蝶積極尋找合適嘅寄主植物去產卵，而幼蟲則努力覓食，再結蛹和羽化為蝴蝶。以下介紹三種蝴蝶，你又見過邊種？
飛行能手：統帥青鳯蝶 承繼鳯蝶科家族高強飛行能力，統帥青鳯蝶飛行快速，甚少停低休息。當佢哋停低採花蜜或者產卵時，就係最佳觀察時機。
特徵：翅膀上有幾排細碎蘋果綠色斑紋
幼蟲寄主植物：含笑同其他木蘭科植物
內置地圖：網絲蛺蝶翅膀上滿布縱橫交錯網狀紋，有如地圖上嘅經緯線，鐘意停喺地面吸水，易認！易見！
特徵：呈白色或淺黃色嘅翅膀上有不規則縱橫黑線，翅邊參差不齊
幼蟲寄主植物：青果榕同其他榕屬植物
食腐嚐糞：忘憂尾蛺蝶芸芸蝶海中出名重口味，鐘意吸食糞便同腐果，覓食時喺地面低飛或停留
特徵：後翅有一對突出翅尾，翅面以白色為主，後翅有零碎黑斑紋
幼蟲寄主植物：亮葉猴耳環同翼核果
知多啲：
蝴蝶一年四季出沒，但一般4月至6月同11月品種同數目最多。由於佢哋係變溫動物，鐘意曬太陽，陰天或者太凍就無咁活躍，而喺有陽光嘅地方就更易見到！
想去紅花嶺郊野公園睇蝴蝶？
即刻去郊野樂行網站睇下郊遊路線嘅交通資訊，仲有沿途靚景相！
紅花嶺郊遊徑 ( bit.ly/48BQBos )
蓮麻坑郊遊徑 ( bit.ly/3UZb57u )
提提你：
愛護自然、不騷擾，不捕捉，不採摘
兩條郊遊徑均為中高難度線路，出入口同郊遊徑上都無補給點，途中亦無退出路徑
遊覽紅花嶺郊野公園需要遠足最少五個小時。山友要量力而為結伴同行，帶備足夠裝備同食物
六月天氣炎熱，務必帶備充足飲用水及防曬用品
雨季將至，出發前務必留意天氣預告；出發後亦要時刻注意天氣情況
山路狹窄，互相禮讓，共享美景
(教材2025山曆6月－蝶蝶．不休)
圖片及資料來源：
香港郊野公園