話說愉景灣之行已經講咗好耐，總有各種理由及狀況遲遲冇起行。直到見到有個 Monchhichi夏日祭，下午茶好似幾吸引，但眼見夏天同暑假，又怕好熱怕人多，拖咗好耐，終於捉緊9月嘅尾巴，Monchhichi夏日祭最後一日，出發喇 😄
因為天氣好熱好曬，所以就決定晏啲先出發，去到食完下午茶，再慢慢行下。去愉景灣，🐻 選擇咗陸路。喺欣澳轉巴士DB03P，唔使20分鐘車程，就到咗愉景北商場 🙃
可能聽日係假期，check in住酒店嘅人都好多。下午茶三點三開始，三點可以入座，周圍影下相打下卡，下午茶仲送每人一個Monchhichi口罩套添 🤗
大部分嘢食都係普通嘢，有餃子，雞翼，燒賣，馬拉糕，德國腸，火腿，春卷，粥粉麵等等，而甜品選擇亦唔算太多，但因為插咗支Monchhichi旗仔，而且周圍都有Monchhichi嘅佈置，所以非常可愛，打卡一流。所有嘢食refill得都好快。至於味道，不過不失算OK。🐻 最鍾意食就係佢哋嘅Parma Ham配蜜瓜，蜜瓜幾甜幾好食。以240蚊一位嘅價錢嚟講，可以舒舒服服食個Tea，影相打卡當度假，都真係幾唔錯㗎。相信亦都係吸引咗好多人嚟食嘅原因 😆
食完嘢已經5點幾，太陽準備落山，雖然冇咁曬，但係戴住口罩喺戶外行都係覺得好焗促，成身痴笠笠。行下海濱教堂，心鎖長廊，再搭區內巴士到愉景廣場，遙遠眺望大白灣沙灘，悠悠閒閒，直到天色漸暗 🙃
期間老公竟然撞到那些年嘅校友！因為佢讀書嘅地方好少華人，香港人就更加少，所以喺異國他鄉識到同聲同氣嘅人非常難得。而估唔到隔咗咁多年後，會喺香港再撞返。世界好大，人與人嘅相遇確實好微妙 🥰
愉景灣，係一個好安靜嘅地方，冇咩娛樂，冇太多美食。對於習慣熱鬧，喜愛急速嘅市區人，可能會覺得有啲悶。但呢度，確實係一個讓你遠離煩囂，放慢腳步，細心欣賞嘅地方 😌
#天氣太熱冇行太多地方 🤪
#但係食下睇下都幾唔錯 😉
#開心假期可以放鬆唞唞 🤗
圖片及資料來源：
著數熊日記