食物安全中心 香腸檢測報告點睇 加工肉類 適可而止

【香腸檢測報告點睇】
「香腸等加工肉類唔好食太多！」呢句話可能大家都聽唔少， #食安小隊 亦多次提醒各位進食加工肉類嘅風險。有機構喺公布一項有關香腸嘅調查報告，指部分香腸樣本屬於高脂、高鈉（鹽），亦有樣本含有呋喃西林代謝物（SEM）、多環芳香烴、塑化劑等物質。

食安有話兒：
喺個別香腸樣本檢出嘅塑化劑及多環芳香烴含量輕微，含量亦低於歐盟嘅相關標準；而食品法典委員會則無相關嘅標準。食安中心嘅風險評估亦顯示，正常食用並唔會影響健康，市民毋須過分擔心。
除咗喺個別樣本檢出其中一種硝基呋喃類藥物（nitrofurazone）嘅代謝物SEM外，全部樣本都無檢出其他硝基呋喃嘅代謝物。
事實上，SEM既可以天然存在喺部分嘅食物入面，亦可以經食品加工過程中產生。因此，食品法典委員會及國際間唔同嘅食品監管機構都認為，喺食物中檢出SEM並唔一定代表曾經使用nitrofurazone。
本港法例規定豬肉及禽肉等食物中，唔可以檢出呋喃唑酮及呋喃他酮；有關物質亦已經納入喺食安中心嘅恆常食物監測計劃。
過去三年，食安中心一共抽取咗超過1650個樣本作硝基呋喃嘅檢測，全部樣本合格。

食安提示：
#食安妹妹 ：唔好介意我長氣，加工肉類（包括香腸）被國際癌症研究機構列為「令人類致癌」。雖然好滋味，但加工肉類都係「分享及淺嚐」，避免食過量，同埋要保持均衡同多元化飲食，多食蔬果。

#食安仔 ：仲有，加工肉類普遍鈉含量高，攝入過量嘅鈉會增加患上高血壓嘅風險。買預先包裝食物時，參考營養標籤，揀鈉含量較低嘅產品！