【強檢消息】12 月 22 日 10 個指明地方被納入強制檢測公告

【按時檢測】因應多宗陽性檢測個案，9 個指明地方被納入強制檢測公告；另外，因應喺上水採集到檢測呈陽性嘅污水樣本，有 1 個指明地方亦被納入強檢公告。喺指明時段去過呢啲地方嘅話就要按時完成核酸檢測。

另外，由12月23日起，政府會豁免以下兩類人士進行強制檢測，包括持有註冊醫生發出醫生證明書，證明其因健康原因而未能使用咽喉拭子樣本進行檢測嘅人士，以及因行動不便而未能進行檢測嘅人士。佢哋可按需要自願進行快速抗原測試。

簡而言之，3 個月內曾經檢測陽性嘅人士、3 歲以下嘅幼童同上述兩類人士無需接受強制檢測。

此外，經檢視使用情況同市民需求，政府會停止深喉唾液樣本收集包嘅派發同收集服務。由 12 月 24 號起，醫管局指定普通科門診診所、郵政局同港鐵站會停止派發深喉唾液樣本收集包。而由下年 1 月 1 號起，醫管局指定普通科門診診所、衞生署診所同政府場地亦會停止收集深喉唾液樣本。

提提你 全港所有社區檢測中心同檢測站喺 12 月 24 至 27 號期間嘅開放時間會調整為上午 10 點至晚上 6 點，今日發出嘅強檢公告檢測期限會延長 1 日至 12 月 25 號。