公立醫院及院舍快速抗原測試要求3月25日起撤銷

【撤銷要求】因應新冠疫情持續緩和，政府公布 3 月 25 號起，撤銷現行適用喺公立醫院、安老院同殘疾人士院舍嘅快速抗原測試要求。探訪人士唔使喺探訪前做快測；而公立醫院臨床員工、院舍員工同住客亦都唔使再每日做快測。

為咗繼續保護重點人群同場所，減低病毒傳播嘅風險，政府提醒所有公立醫院、院舍嘅探訪人士同員工喺進入相關場所時，都應該繼續佩戴口罩 。