孖崗山位於大潭郊野公園，由南北兩座高度相約嘅山峰連成，主峰海拔386米、副峰海拔363米，望落唔算高，但山上景色一流，一眼盡望南岸壯麗海景同赤柱半島。每年12月左右，大頭茶喺山徑上夾道而開，白瓣黃蕊嘅花散落滿山，孖崗山往紫崗橋路上仲有小段由大頭茶樹冠交織而形成嘅隧道，就算花期過後，整朵掉落嘅大頭茶都係路上其一最美風景線。
要上孖崗山，先要預備強大嘅四頭肌、面對無盡梯級嘅耐性同體能。作為衛奕信徑第一段首個山峰，由赤柱峽道起步旋即要挑戰著名嘅天梯！過千級陡峭又密集嘅樓梯同海景一樣一望無際，上升坡度亦相當急，首公里路程就要攀升接近300米，登頂後又要急降超過200米到淺水灣坳。過埋淺水灣坳後，要繼續攀升280米上紫羅蘭山，然後再下降約200米先到達黃泥涌水塘終點。衛奕信徑第一段路線長度只有5公里，但由於起伏甚大而且部份山徑崎嶇，屬於高難度路線，必須小心而行，並要內置良好體能同配備同伴先好去挑戰，仲要帶夠飲用水同做足準備呀！
更多郊遊資訊：
衛奕信徑(第一段)赤柱峽道至黃泥涌水塘 ( bit.ly/3upXJpF )
大潭郊遊徑 ( bit.ly/3sQcRfM )
圖片及資料來源：
香港郊野公園