🔆【欣澳長索島 輕鬆周末遊】#著數熊日記 ❣️
🐻 今朝睇到條YouTube片，介紹欣澳長索島，話係港版「天使之路」，就係咁，🐻 即興出發半日遊。#有啲嘢做咗就會變成一個回憶，#唔做只會變成一個約定 😊
去長索島好方便，搭地鐵到欣澳站，A出口沿海濱長廊一直行，全程平路，非常易行。途中仲會見到一支支木樁插喺水中。原來呢度曾經係水上儲木場，呢啲木樁以前係用嚟固定水上面嘅浮木。唔知隨時間流逝，呢啲木樁會唔會有一日都消失呢？當呢道風景仍在時，記得把握機會打下卡呀 🤳
行到海濱盡頭，就會轉入一條綠色欄杆小路，一直行，就會到達鹿頸村。呢度有公廁，可以補給水，同埋有賣風味嘅「柴火燒賣」。再經過鹿頸碼頭後，就會見到「港版天使之路」，潮退時就會出現，但其實佢真係一條非常短嘅連島沙洲 😅
如果大家記得 🐻 兩年前曾經分享過 #西貢橋咀島 ，（ jetsobear.com/r1c9 ）其實嗰度嘅「連島沙洲」更加長，而且水更加清澈添 😄
🐻 冇去過日本小豆島嘅天使之路，但前年自駕去鹿兒島時，曾經去過知林ヶ島，亦係一個需要潮退出現沙洲先可以到達嘅島。但特別之處係，沙洲唔係每日出現，有時甚至幾日都冇，而且出現嘅時間好短，幾個鐘就會消失。所以要行上呢條路，Timing真係好緊要。🐻 上次去，雖然已經提前查咗潮汐漲退時間，但去到仍然冇機會等到沙洲嘅出現，登唔到島。所以話，天氣真係不似預期。講得太遠喇，因為 🐻 真係好想去旅行呀～ 🤪
而家大家都冇得去旅行，所以一到周末，就算係偏冷門嘅地方，都人頭湧湧，今日欣澳都唔例外。大家喺郊遊時，都要謹記自己垃圾自己帶走。大自然饋贈我哋呢個美麗嘅地方，我哋一定要好好保護啊 🤗
最後分享一段小片段，齊齊開心迎接新一天 😉
【所有免費頻道】👇🏻
► 著數熊網站 🌍
► jetsobear.com
► 入咗MeWe未呀～ 😉
► mewe.com/join/jetsobear
► Follow埋我哋嘅IG 😍
► instagram.com/jetsobear
► 加入我哋Telegram 🛫
► t.me/jetsobear
圖片及資料來源：
著數熊日記