你真係識用漂白水？

【你真係識用漂白水？】
為咗預防新型冠狀病毒，相信大家都用多咗漂白水去為家居清潔，雖然漂白水可以有效殺滅細菌、真菌同病毒，不過未必個個都真係識用！卓健準備咗以吓有關使用漂白水嘅貼士俾大家

‍謬誤：用熱水稀釋漂白水消毒效果更加好？
‍建議：稀釋漂白水嘅時候要用冷水！因為熱水會令到漂白水嘅主要成分分解，失去咗佢本身嘅效能！

‍謬誤：預先稀釋定漂白水隨時拎嚟用？
‍建議：經過稀釋嘅漂白水建議喺準備後24小時內使用先有效消毒！因為放得越耐，漂白水成份次氯酸鈉會隨着時間分解而減低效用！

‍謬誤：清潔乜嘢都用1比99嘅比例稀釋漂白水?
‍建議：如果一般家居清潔同消毒，建議以1比99稀釋漂白水; 如果係消毒嘔吐物、排泄物或者分泌物污染咗嘅表面同物件，建議以1比49稀釋漂白水。以上嘅比例係以含5.25%次氯酸鈉嘅家用漂白水計算。而如果需要清潔金屬表面，則應使用火酒去消毒。

‍謬誤：漂白水可以同其他清潔劑一齊用？
‍建議：咁樣一齊用唔單止有機會減低消毒效能，仲有機會產生危險嘅化學作用，例如產生有毒氣體！而一般使用漂白水都要確保空氣流通，同埋戴好防護裝備，例如口罩、手套、護眼罩同膠圍裙等。